迷你食物處理器

林太平時需要用到免治肉的時侯，都會由買開的肉販代為攪碎，因為fatman會當你面前清洗舊肉後先放入機攪碎，平時夜回家路經肉檔，見佢都有清洗乾淨部機，對佢地有信心，但有次買完回家打開包肉，見到有黑色的物體後，就無這支歌仔唱lu。
正在物識一個方便易用、仲要是平平地(因為貴野是唔可以比「傭傭」用o架)的食物處理器(即攪拌機)時。今個暑假去加拿大探姨甥仔，在佢屋企用過這部機後，就覺得幾好用喎。回港後，見到這機有大特價，於是二話不說就帶它回家。教識「傭傭」用後，佢不知幾愛佢，連續幾日都整d要用免治肉的菜式。

尼部機一來細細部，二來非常簡便。整部機只得兩個功能，一是攪碎(可以有少少口感)，另一個是攪到好碎碎，好似用醬咁。

芝士肉碎扒西蘭花

這道菜，係十多前年在天后一間菜館食過，餐館都關門大吉好幾年。自從食過後，在「林太煮」好多時都出現，因大小魔十分喜愛。

車打芝士肉碎扒西蘭花食譜

材料 ﹕
瘦肉	300克
肥肉	40克
洋葱	1/2個
西蘭花	1棵
車打芝士片	2片
蒙莎莉那芝士片	2片
(Mozzarella)
清雞湯	適量
醃料 ﹕
鹽	1/4茶匙
糖	1/2茶匙
紹酒	1/2茶匙
生粉	1茶匙
蠔油	1茶匙
生抽	1茶匙
油(後下，落鑊前)	1茶匙

做法 ﹕

1. 瘦肉、肥肉洗淨後抹乾，分別切開數件，先將瘦肉放入食物處理器(攪拌機)打碎，再加入肥肉打碎(要有少許口感，不要攪太碎)。加入醃料(除油外)拌勻，醃15-20分。下鑊前加入油拌勻。

2. 西蘭花切開，用少許鹽水浸片刻，備用；洋葱去衣洗淨切粒，備用。

3. 西蘭花灼熟，隔去水分，放進碟上(圍邊，留空中間位置)。

4. 燒熱鑊，下適量油爆香洋葱，取起；原鑊加入少許油燒熱，將肉碎炒至九成熟，加入已爆的洋葱、雞湯、芝士片煮至濃稠即可上碟。

備註 ﹕

-    芝士可應個人喜愛加減，但小心過鹹。

-    雞湯﹕我大約放入半碗左右，自行調配汁液多少。

蒜子炆魽魚

終於可以放假抖下，最近真係好busy busy……………(指肚皮)

排到滿滿的，今晚就夫家提早做冬，聽晚就食姪女出嫁前的上頭飯，第二日就姪女在教堂行婚禮，跟住夜晚又bbq慶祝另外兩個姪女生日。之後兩日又煮大餐比姨甥仔食(因佢尊程回港參加表妹婚禮)，第二日輪到「大姐大」煮大餐比姨甥仔食，唔夠兩日，姪女擺酒………….總知就食到肚滿腸肥啦，今鋪仲唔大大劑，有排減肥囉…………

個頭話減肥食少d，尼頭又回味「大姐大」當晚煮的魽魚，跟著對腳已經踏入街巿搵魽魚，又比我搵到喎。
這魽魚的做法，都幾分似「就仔」(他是我老爹，現在只能回味他廚藝lu)的煮法。最估唔到係，「大小魔」平時唔多食魚的都欣賞，hehe.............

蒜子炆魽魚

材料 ﹕

魽魚(約20兩重)	1條
豆腐卜 燒南	6粒 適量
蒜頭 / 獨子蒜	1整個 / 5粒
薑片	8片
大蒜	1支
芫茜	適量
紹酒(灒酒用)	1湯匙
清水	1/2杯
醃料 ﹕
紹酒	1/2湯匙
胡椒粉	適量
調味 ﹕
柱候醬	1湯匙
甜麵豉醬	1湯匙

做法 ﹕

1.  魽魚請魚販代勞劏好及切件，回家清洗乾淨，用少許生粉擦洗一次，抹乾水份，用醃料拌勻，醃約15分鐘左右。加入少許生粉拌勻，備用。

2.  用整個蒜頭的，撕開衣，洗淨備用。如用獨子蒜，去衣後切開4-5件(視乎大細)。

3.   大蒜洗淨去根，斜切，備用。豆腐卜洗淨一開二，備用。

4.   下適量的油，將蒜頭炸至金黃色取起。

5. 將魽魚煎至微黃取起。

6.  剩下約半湯匙油，將薑片下鑊爆香，隨即加入大蒜、蒜子、燒腩及調味爆香，灒酒，下魚及水，煮滾後，轉細火炆約10分鐘，即成。

泰式豬頸肉 @ 空氣炸鍋(Airfryer)

氣炸鍋買咗好幾年，初初用得最多係《大細魔》，兩姐弟成日整氣炸薯條、饅頭..........，玩完一輪，又打入冷宮。諗諗下無理成日放係到，要同佢講通多D，唯有教《傭傭》陪下佢。

泰式燒豬頸肉 @ 空氣炸鍋(Airfryer) 食譜

材料 ﹕

急凍豬頸肉                                                            450克

泰國青檸(青柑仔)                                 1個

芫茜                                                                           適量

醃料 ﹕

胡椒粉                                                                     少許

紹酒                                                                    1/2湯匙

椰糖                                                                        1湯匙

(隨意改用黃糖或砂糖)          

魚露                                                                         1湯匙

老抽                                                                                      1/2茶匙

蘸汁﹕

青檸汁                                                                 1湯匙

魚露                                                                                                   1湯匙

椰糖                                                                         1湯匙

做法 ﹕

1. 豬頸肉徹底解凍後，洗淨抹乾水，在兩面肉上介幾刀(不要順肉紋)，尤其邊位，防熟後捲起。

2. 將豬頸肉放入深碗中或密實袋，將醃料依次序加入拌勻。置室溫醃半小時，之後放入雪櫃最少5小時，或過夜。

3. 焗前取出，置室溫半小時。

4. 預熱氣炸鍋 ﹕鍋內注入半杯清水，用200度5分鐘。

5. 將豬頸肉平放在炸鍋煎盤上，用200度焗約12分鐘(視乎厚薄)至熟，中途返轉一次，取出切片上碟。